Waahi Poukai

I ngaa tau o te 1933 i tuu te Koroneihana ki runga o Waahi Paa. I konei ka whakatauria ngaa tuuaahuatanga katoa o te Kiingitanga.

Ka taka ki te waa kia tahuri te paa ki te whakatikatika i toona Wharekai a Miria Te Kakara, aa, naa konaa i whakatauria e Te Puea kia kawea atu te Koroneihana ki runga o Tuurangawaewae Marae.

I runga anoo pea i teenei whakaaro oona, ko taa Kiingi Koroki ki te iwi, ‘Waiho a Waahi hei kaainga mooku’. Ko te whakamaaoritanga o teenei koorero ki a maatou, ko te noho mai o teenei marae oona hei kaainga e noho tangata noa ai ia ki waenga i toona iwi.

Noo te matenga o Kiingi Koroki i te tau 1966, ka hui ngaa kaumaatua ki roto o Maahinaarangi, aa, naa wai ka puta i a raatou te whakaaro kia tuu he Poukai ki Waahi Paa hei tohu whakamaumahara i toona Koroneihana.

Ka whakaaengia e Te Arikinui, ka whakatinanatia e Te Marae raaua tahi ko tana teina, a Hera (Sally Fie). Ka mahue ki a raaua ngaa whakahaere Poukai katoa, kai mai, kaupapa mai, take o te raa mai.

A kaati ake, ko te rima ngahuru maa whitu tau teenei o te Poukai ki Waahi Paa.